678670, с.Чурапча ул. Карла Маркса 19 +7(984)1182258 m.haacka@gmail.com

ЧУРАПЧЫТААҔЫ «УЛЫБКА» УҺУЙААН ЦИФРОВОЙ ТЕХНОЛОГИЯҔА СИТИҺИИЛЭННЭ

Сэтинньи 24 күнүттэн ахсынньы 14 күнүгэр  диэри ыытыллыбыт I Педагогическай Хакатон күрэҕэр чурапчылар ситиһиилээхтик кытыннылар. «Улыбка“ уһуйаан  интерактивнай үөрэхтээһин платформатын оҥорон, “Бастыҥ хамаанда” анал аат кыайыылааҕынан ааттанна. 

СӨ Үөрэҕин министиэристибэтэ,  инновация, цифровой сайдыы министиэристибэтэ, С.Н. Донской аатынан СӨ  идэ таһымын үрдэтэр эбии үөрэхтээһин автономнай тэрилтэтэ, «Юные якутяне» ресурснай киин тэрийдилэр.

Хакатон сүрүн соругунан үөрэхтээһин тэрилтэлэрин олохтоох IT-хампаанньалары кытары алтыһыннаран, практикаҕа саҥа көдьүүстээх көрүҥнэри үөскэтиигэ туһуланар.

Маҥнайгы түһүмэххэ – биэс киһиттэн турар хамаанда тэринэн,  сорудаҕы  кэтэхтэн толордулар. Иккис түһүмэххэ – IT-хампаанньалары кытары билсиһэн, миэстэтигэр тиийэн алтыһан, билиилэрин хаҥаттылар. Үһүс түһүмэххэ – Дьокуускайга IT-Пааркаҕа икки күн устата үлэлээн, экспердэр иннилэригэр оҥорон таһаарбыт үлэлэрин көмүскээтилэр.

24 хамаанда тэриллибититтэн, тиһэҕэр диэри 16 хамаанда кыахтарын турууласта. Үөрэх эйгэтин үлэһиттэрэ араас технологиялары баһылаан, төлөпүөн сыһыарыыларын, интерактивнай оонньуулары, араас таһымнаах порталлары оҥорууга кыахтаахтарын көрдөрдүлэр.

Чурапчы улууһун «Улыбка“ уһуйаана (кыттааччы састаабыгар соҕотох уһуйаан) “TREND – это Ваш навигатор в мир дошкольного детства» диэн интерактивнай үөрэхтээһин платформатын оҥорон, “Бастыҥ хамаанда” анал аат хаһаайына буолла. Бу платформа оҕо, төрөппүт, иитээччи күннээҕи олоҕор, билиитин хаҥатарыгар, үлэтигэр туһанарыгар туһуланар.

 

Күрэх түмүгүнэн, Ньурба улууһа “Культура народов Саха” диэн виртуальнай бырайыагынан маҥнайгы, онтон Хаҥалас улууһа “Живые стенды” бырайыагынан иккис миэстэни ыллылар. Мэҥэ-Хаҥалас улууһа үһүс миэстэҕэ учуутал үөрэнээччитин кытары алтыһыытын платформатынан тигистэ. «Бастыҥ хамаанда» анал аат Чурапчы улууһугар, «Бастыҥ менеджер» уонна «Бастыҥ дизайнер» Нам улууһугар, «Бастыҥ оҥоруу» Бүлүү улууһугар ананнылар.

 

Күрэх түмүгүнэн инникитин бырайыактары үлэҕэ киллэрии,  саҥаттан саҥа суоллары тобулуу сорукка турда. Хас биирдии хамаандаҕа IT-Паарка резиденэ буоларыгар кыах бэрилиннэ.

“Саҥа олох”.