Бүгүн, тохсунньу 15 күнүгэр, Чурапчытааҕы полиция отделыгар полиция начаалынньыга, подполковник Иннокентий Свинобоев салайааччылаах отдел сыллааҕы үлэтин-хамнаһын отчуотун иһиттилэр.

Чурапчы улууһун прокурора, юстиция полковнига Иван Ядреев, прокурор солбуйааччыта, юстиция капитана Игорь Черкашин уонна улуус баһылыгын социальнай боппуруостарга солбуйааччы Николай Аммосов кытыннылар.

Полиция майора, штаб начаалынньыга Вера Скрябина 2019 сыл түмүгүнэн оперативнай-служебнай үлэ түмүгүн туһунан иһитиннэрдэ. Салгыы холуобунай буруйу оҥоруу биричиинэлэрин, тэрилтэлэр бэрээдэги көрүүгэ уопсастыбаннай холбоһуктарын, норуот дружинатын үлэтин, эрдэ буруйу оҥорон итиэннэ итирик туруктаах холуобунай эппиэтинэскэ тардылла сылдьыбыт дьон буруйу оҥорууларын аччатыыга туох үлэ ыытылларын туһунан полиция начаалынньыгын солбуйааччы, подполковник Влас Михайлов дакылааттаата.

Ыытыллар үлэ хайысхаларынан ОУУПуоПДН начаалынньыга, полиция майора Петр Монастырев, холуобунай ирдэбил начаалынньыгын эбээһинэһин толорооччу, полиция старшай лейтенана Станислав Захаров, паспортнай остуол начаалынньыга Лена Атакова, ОГИБДД начаалынньыга, полиция майора Василий Ефремов сиһилии иһитиннэрии оҥордулар.

Дакылаатчыттары истэн баран улуус прокурора Иван Ядреев, прокурор солбуйааччыта Игорь Черкашин туһааннаах боппуруостары биэрдилэр, бэйэлэрин өттүлэриттэн чопчу сыалы-соругу туруоран үлэ-хамнас көдьүүстээхтик ыытылларыгар санааларын эттилэр.

Полиция начаалынньыга Иннокентий Свинобоев ааспыт сыл түмүгүнэн үтүө суобастаахтык уонна уопсастыбаннай бэрээдэк тупсарыгар үлэлэспит тустаах сотрудниктарга махтал суруктары туттартаата. Ону таһынан 2019 сылга личнэй састаап уопсай үлэҕэ куһаҕана суох көрдөрүүлэммитин туһунан кэпсээтэ.

Түмүккэ юстиция полковнига Иван Васильевич: “Саҥа сыл саҕаланна, онон тохтоон хаалбакка салҕыы үлэлиибит. Хас биирдии сотрудник бэйэтин үлэтин үчүгэйдик оҥордоҕуна үлэбит уопсай таһыма үрдүөҕэ. Ону өйдүөххэ наада”, – диэн эттэ.

Ааптар: Сэмэн Жендринскэй.

Источник: UlusMedia