Тохсунньу 18 күнүгэр Чурапчытааҕы Ыччат координационнай Сэбиэтин ааспыт сылы түмүктүүр “Эн кэмиҥ” диэн бастакы улахан тэрээһинэ – Ыччат баала буолан ааста.
Баал иннинэ Чурапчы улууһун дьаһалтатын мунньахтыыр саалатыгар Ил Түмэн дьокутаата Михаил Гуляев, СӨ Ыччат дьыалаларыгар уонна социальнай коммуникацияларга миниистирэ Степан Саргыдаев, улуус дьокутааттарын Сэбиэтин бэрэссэдээтэлэ Афанасий Захаров, улуус баһылыгын социальнай уонна ис бэлиитикэ боппуруостарыгар солбуйааччы Николай Аммосов, СӨ Ыччат бырабыыталыстыбатын бэрэссэдээтэлин 1-кы солбуйааччы Анастасия Сивцева, Ил Түмэн судаарыстыбаннай мунньаҕын иһинэн Ыччат парламенын спикерэ Алексей Иннокентьев кыттыылаах төгүрүк остуол тэрилиннэ.
Манна улуус нэһилиэктэрин ыччатын уопсастыбаннаһа, нэһилиэктэр баһылыктара, тэрилтэ салайааччылара кытыннылар. Кэпсэтии түмүгүнэн олунньу ый ортото Ыччат бырабыыталыстыбатын дэлэгээссийэтэ Чурапчы улууһун ыччатын кытары көрсүһүү тэрийэн, бырайыактары оҥорууга тустаах сүбэни-аманы биэрэргэ сөбүлэҥин биэрдэ. Миниистир Степан Анатольевич биирдиилээн ыйытыыларга чопчу хоруйдары биэрдэ уонна ханнык баҕарар саҕалыыр дьыалаларын өйүүрүн биллэрдэ.
“Айылгы” норуот айымньытын дьиэтигэр ааспыт сыл түмүгүн таһаарар үөрүүлээх чаас тэрилиннэ. Улуус баһылыга Андрей Тимофеевич Ноговицын эҕэрдэ тыл эттэ, ааспыт сыл түмүгүнэн бастыҥ үлэлээх ыччакка улуус дьаһалтатын бочуотунай грамотатын туттарда. Ил Түмэн дьокутаата Михаил Гуляев уонна СӨ Ыччат дьыалаларыгар уонна социальнай коммуникацияларга миниистирэ Степан Саргыдаев улууска ыччат үлэтин-хамнаһын сыаналаан, махтал суруктары туттардылар.
Улуус дьаһалтатын ыччаты кытары үлэҕэ отделын исписэлииһэ Анастасия Спиридонова ааспыт сыл түмүгүнэн алта бастыҥ номинацияны ааттаата:
-“Сыл бастыҥ лидерэ” – Алаҕар нэһилиэгин ыччаты кытары үлэҕэ салаа исписэлииһэ, “Дьүөгэ” нэһилиэк эдэр ийэлэрин түмсүүтүн чилиэнэ Калерия Борисова;
-“Бастыҥ айар талааннаах ыччат” – “Айыллаана” Хадаар нэһилиэгин ийэлэр кулууптарын чилиэнэ, “Ыччат сынньалаҥын тэрийиигэ сүрүн хамсааһын – Ыччат көхтөөх буолуута” бырайыак ааптара Ирина Тарасова;
-“Бастыҥ уопсастыбаннай түмсүү” – “Чолбон” ыччат үҥкүүтүн ансаамбыла (сал. Иннокентий Поисеев);
-“Олоххо киирбит бастыҥ бырайыак” – “Харысхал” Чурапчытааҕы киин балыыһа эдэр быраастар уопсастыбаннай түмсүүлэрэ (сал. Андрей Захаров);
-Ыччат бэлиитикэтин эйгэтигэр “Бастыҥ нэһилиэк баһылыга” – Чакыр нэһилиэгин баһылыга Константин Лебедев.
Нэһилиэк эдэр ыччата бэлэмнээбит нүөмэрдэрин көрдөрдүлэр. Сынньалаҥ кэмигэр араас хабааннаах аттракционнар, оонньуулар тэрилиннилэр, хаартыскаҕа түһэр фотозона, кафе үлэлээтэ. Саха эстрадатын чаҕылхай сулустара Галя Виноград уонна Гоша Васильев-Джида эҕэрдэлээтилэр.
СӨ Ыччат бырабыыталыстыбатын бэрэссэдээтэлин 1-кы солбуйааччы Анастасия Сивцева Ыччат баалыттан астыммытын, туох даҕаны итэҕэһи-быһаҕаһы көрбөтөҕүн, барыта тэрээһиннээхтик ааспытын бэлиэтээтэ.
Ааптар: Сэмэн ЖЕНДРИНСКЭЙ.
Источник: UlusMedia