678670, с.Чурапча ул. Карла Маркса 19 +7(984)1182258 m.haacka@gmail.com

АММА ОРТО ОСКУОЛАТЫН ҮӨРЭНЭЭЧЧИЛЭРЭ ХАЙЫҺАРЫНАН БЕРЛИҤҤЭ ТИИЙИЭХТЭРЭ

Улуу Кыайыы 75 сылын көрсө маннык ураты аахсыйаны, Үлэ Дьоруойа Роман Константинов аатынан Амма орто оскуолатын кэлэктиибэ, сүрүн салайааччы, дириэктэр Виктория Пермякова этиитинэн тэрийдилэр. Аахсыйа өссө былырыын ыытыллыбыт “Хайыһардар дайаллар” хамсааһынтан кынат анньынан, эбии ситэри тупсарыллан, нэһилиэк энтузиаст хайыһардьыта, хайыһарга Арассыыйа чөмпүйүөнкэтэ, СӨ үөрэҕириитин туйгуна Екатерина Николаевна Павлова көҕүлээһининэн уопсайа 140 киһини хабан, Берлиҥҥэ тиийэр уһун айаны хайыһарынан сүүрэ сылдьаллар.

Биһиги бу аахсыйаны, оскуолабыт салалтатын өйөбүлүнэн 2019 сыл алтынньы 24 күнүттэн саҕалаабыппыт. Мындаҕаайыттан Берлиҥҥэ диэри 11 тыһыынча кэриҥэ ырааҕы тимир суолун хайысхатынан барыахтаахпыт, билиҥҥи туругунан оҕолуун, улахан дьоннуун Алданы аастыбыт.

Сүрүннээн хайыһарынан сүүрүүбүт бэйэбит нэһилиэкпит стадионугар, итиэннэ Аммабыт эбэтигэр ыытыллар. Мин билигин төһө даҕаны Арассыыйа Кубогын иһин күрэхтэһэ айаннаатарбын, үөрэнээччилэрим, бииргэ үлэлиир кэлэктиибим, биир даҕаны күнү көтүппэккэ тахсан син биир хайыһардыыллар. Анал былааммыт, график син биир туолуохтаах. Маннык сүүрүү хас биирдии оҕо доруобуйата бөҕөргүүрүгэр уонна улууспутугар хайыһар успуордунан утумнаахтык элбэх киһи дьарыктанарыгар ананар. Онон Улуу Кыайыы 75 сылын көрсө муус устар ортотугар Берлиҥҥэ тиийэбит диэн кытаанах сорук турар,” – диэн улууспут хайыһарга биир бастыҥ тириэньэрэ Екатерина Николаевна айанын быыһыгар төлөпүөнүнэн сибээскэ таҕыста. Кинилэр билигин, өрөспүүбүлүкэттэн 16 буолан этиллибитин курдук Арассыыйа Кубогын иһин хайыһар күрэҕэр Удмуртия Ижевск куоратыгар 5-10-15 көскө сүүрүөхтэрэ. Бу ыспарсымыаннар ортолоругар Чурапчыттан түөрт киһи: Кытаанах нэһилиэгиттэн Николай Захаров, Хайахсыт нэһилиэгиттэн Мария Эверстова уонна Николай Оконешников бааллар.

Бэйэм хайыһарынан 2-с кылаастаан саҕалаан дьарыктанабын. Тириэньэрбит Екатерина Николаевна олус үчүгэйдик дьарыктыыр. Оскуола оҕото барыта бу аахсыйаҕа кыттыһан күн аайы сүүрэр. Бэйэм нэдиэлэҕэ 2-3-тэ хайаан даҕаны 3 биэрэстэ 400 миэтэрэни хайыһардыырга кыһаллабын. Миигин кытары тэҥҥэ Харитон Павлов, Сандаара Фомина, Туйаарыма Кожурова, Петя Кугдаров дьарыктаналлар, наһаа маладьыас оҕолор. Хайыһардыыр олус үчүгэй. Хайаан даҕаны Берлиҥҥэ тиийиэхпит дии саныыбын. Дириэктэрбит Виктория Ивановна уонна төрөппүттэрбитигэр дьоллоох оҕо сааһы бэлэхтииллэригэр махтанабыт”, – диэн Амма орто оскуолатын 6 кылааһын үөрэнээччитэ Анна Егорова кэпсиир.

 

Онон биһиги оҕолорбут Алдан-Нерюнгри-Тында-Чита-Иркутск-Красноярск-Новосибирск-Омск-Тюмень-Екатеринбург-Пермь-Киров-Ярославль-Москва-Смоленск-Минск-Брест-Варшава-Познань-Потсдам-Берлин тиийиэхтэрэ диэн улахан эрэллээхпит.

АаптарСэмэн Жендринскэй.