Чурапчы улууһун бойобуой дьайыылар бэтэрээннэрин уопсастыбаннай түмсүүтэ, итиэннэ Афганистан сэриитин бэтэрээннэрэ былырыын оҥоһуллубут “Долг. Честь. Мужество” монумеҥҥа сибэкки дьөрбөтүн уурдулар. Бэлиэ тэрээһин Интернационал буойуттар күннэрин чэрчитинэн ыытылынна.

Олунньу 15 күнүгэр, оруобуна 30 сыл анараа өттүгэр, сарсыарда 10 чаас 30 мүнүүтэҕэ, Адмуртьянан ааһар муостанан, байыаннай тиэхэньикэ бүтэһик холуонната ааспыта. Түгэх иһэр БТР-га, 40-с аармыйа хамандыыра, генерал-лейтенант Борис Громов бэйэтинэн олороро. Ол саҕанааҕы, көрдөрөр-иһитиннэрэр хампаанньалар устубут хаадырдара, Аан дойдуну биир гына тилийэ көппүттэрэ.

Ол кырыктаах, уодаһыннаах сэриигэ, мөлүйүөн аҥара Сэбиэскэй Сойуус саллааттара кыттыыны ылбыттара, олортон хомойуох иһин 14 тыһыынча саллаат сырдык тыына быстыбыта. “Афганец” диэн тыл биһиги дойдубутугар туспа, ураты өйдөбүлү ылбыта. Ол да иһин бүгүн, үгэс быһыытынан, дойду “афганецтара” бука бары түмсэн, ол уордаах сэриигэ олохторун толук уурбут, хорсуннук өлбүт доҕотторун ахтан-санаан, кэриэстээн, кинилэргэ анаммыт пааматынньыктарга, монуменнарга сибэкки дьөрбөтүн, чүмэчи уурдулар.

СӨ Ис дьыала уорганнарын уонна буойскаларын бойобуой дьайыылар бэтэрээннэрин Ассоциациятын Бырабылыанньатын бэрэссэдээтэлэ, полковник Николай Гребенников, олунньу 12 күнүнээҕи 1№-дээх “Интернационал буойуттар күннэринэн” биллэрбит дьаһалыгар олоҕуран, Чурапчы улууһун бойобуой дьайыылар бэтэрээннэрин уопсастыбаннай түмсүүтэ (бэрэссэдээтэл Илья Березкин), итиэннэ Афганистан сэриитин бэтэрээннэрэ Савелий Дьячковскай, Николай Беляев бу күнү суолталаан, былырыын оҥоһуллубут “Долг. Честь. Мужество” монумеҥҥа тиийэн сибэкки дьөрбөтүн уурдулар.

Мустубут дьоҥҥо туһаайан, СӨ Ил Түмэнин дьокутаата, саппаас хапытаана Семен Никитин, Чурапчы нэһилиэгин дьаһалтатын сүрүннүүр исписэлииһэ Андрей Дьячковскай тыл эттилэр, Афганистан сэриитин бэтэрээннэригэр нэһилиэк дьаһалтатын аатыттан өйдөбүнньүк бэлэхтэри туттардылар.

Ааптар: Сэмэн Жендринскэй.