Бүгүн, олунньу 21 күнүгэр, Аҕа дойдуну көмүскээччилэр күннэринэн уонна Улуу Кыайыы 75 сылын көрсө, Чурапчыга Александр Федотов аатынан ыспартыыбынай комплекс саалатыгар тэрилтэлэр икки ардыларыгар байыаннай хаамыыга күрэхтэһии ыытылынна.

Кыайыы параадын  СӨ Ил Түмэн дьокутаата, саппаас хапытаана Семен Иванович Никитин салайда. Параад саҕаланыытыгар Кыайыы былааҕын, Семен Новгородов аатынан Чурапчы орто оскуолатын “Беркут” уонна Иван Павлов аатынан Чурапчы орто оскуолатын “Память” байыаннай-патриотическай кулууп иитиллээччилэрэ өрө тутан таҕыстылар.

Бүгүҥҥү байыаннай хаамыыга уопсайа 54 тэрилтэттэн уонна улуустааҕы “Юнармия” оскуола иитиллээччилэрин 11 (36-лыы киһилээх) холуонналара хаамыыга кытыннылар.

Параад кыттыылаахтарыгар улуус аҕа баһылыга Андрей Ноговицын, улуус дьокутааттарын Сэбиэтин бэрэссэдээтэлэ Афанасий Захаров, Чурапчы нэһилиэгин баһылыга Владимир Сивцев эҕэрдэ тыллары эттилэр.

Күрэхтэһии кэнниттэн 396 киһи бары туран эрэ “День Победы” ырыаны хуорунан толордулар. Онон Чурапчы улууһа бүттүүнэ, Улуу Кыайыы өрөгөйдөөх 75 сылын өрө күүрүүлээхтик көрсөргө бэлэмин биллэрэр.

Сэмэн Жендринскэй.