Айыы Кыһата оскуола тэриллиэҕиттэн куорат оҕолорун сахалыы тыыҥҥа, саха кутун иҥэрэр сыалтан үгүс үлэлэри ыытар. Ол курдук күһүн уонна саас айан дьарыкка туруналлар. Тыа сирин олоҕун, оскуола оҕолорун, биллиилээх дьону, норуот маастардарын кытта билсэн музейдарга сылдьаллар. Бу сырыыга Национальнай библиотека иһинэн үлэлиир Оҕо уонна ыччат киинэ «Суруйааччылар айар аартыктарынан» бырайыак чэрчитинэн Чурапчы нэһилиэгэр 59 о5о (7 кылаас үөрэнээччилэрэ) уонна 4 салайааччы буолан Саха народнай суруйааччыта, прозаик, поэт, литературнай критик, тылбаасчыт, журналист С.А.Попов -Сэмэн Тумат 75 сыллаах үбүлүөйүнэн кини дойдутун көрөр, олоҕун, айар үлэтин кытта билсэр сыаллаах-соруктаах кэлэн бардылар.

Оҕолор бастатан туран Саха бастакы лингвист ученайа С.А.Новгородов аатын сүгэр Дархан кыһатыгар сылдьан ыалдьыттаатылар. Салҕыы олимпиецтары үүннэрэн таһаарбыт киэн туттар тренербит Д.П.Коркин музейыгар сылдьан, Чурапчы спорт туоната буоларын дьиҥ чахчы итэҕэйдилэр. А.А.Саввин аатынан краеведческай музей экспонаттарын кэрэхсээн көрдүлэр, музей директора Толстоухов Ю.С. Улуус историятын туһунан кэпсээнэ үгүс оҕо болҕомтотун тарта. Оҕо библиотекатын сэбиэдиссэйэ Е.Н.Дьячковская С.А.Попов-Сэмэн Тумат олоҕун, айар үлэтин сырдаппытын бэркэ сэҥээрэн, сэргээн иһиттилэр. Киэһээ «Чистые берега Дальнего Востока» марафон "Вода России" бүтүн Россиятааҕы акцияҕа бэйэлэрин баҕаларынан кыттыһан, Чурапчы күөлүн кытылын ыраастаатылар. Сотору кэминэн көрсүһүү тэрийэн, суруйааччыны Сэмэн Туматы кытта оҕолор атах тэпсэн олорон сэһэргэһэр былааннаахтар. Суруйааччы сирин-дойдутун кэлэн көрөн, умнуллубат өйдөбүлү иҥэриннэхтэрэ.