Алтынньы  4-5  күннэригэр  Дьокуускайдааҕы Саха циркэтин дьиэтигэр «Мамонтенок 2019»  VI норуоттар  икки  ардыларынааҕы  циркэ ускуустубатын  бэстибээлэ ыытылынна. Манна  Израильтан, Монголияттан, Казахстантан,  Белоруссияттан, Вьетнамтан,  Колумбияттан, Арменияттан  уонна  Арассыыйа  араас регионнарыттан циркэ  артыыстара, кэлэктииптэрэ  кытыннылар.  Ол иһигэр  Чурапчы  улууһуттан  Ярослав Лебедев  салайааччылаах  «GrimFace»  айымньы устуудьуйата  ситиһиилээхтик  кыттан, лауреат үрдүк аатын уонна Москватааҕы Юрий Никулин аатынан циркэ анал бирииһин ылан кэллэ.

Бу  бэстибээлгэ  хайдах  кыттыбыттарын туһунан  устуудьуйа  салайааччытыттан,  «Айылгы» оройуоннааҕы  норуот  айымньытын  дьиэтин исписэлииһиттэн, «Сарыал» уопсастыбаннай түмсүү чилиэниттэн Ярослав Лебедевтэн ыйыталастым.

—  Ярослав,  дорообо,  хаһааҥҥыттан  маннык састааптаах үлэлиигитий?

— Чурапчытааҕы судаарыстыбаннай физкултуура уонна  успуорт  үнүстүүтүн  устудьуоннарын  кытары булсан  үлэлээбитим  6  ый  буолла.  Бастакы хамсааһыммыт  «Саха  КВН»  оонньууларыттан саҕаламмыта.   Хамаандабытыгар  тоҕус  ыччат сылдьар:  Иван  Аммосов,  Алексей  Прокопьев, Александр  Винокуров,  Михаил  Уаров,  Алексей Шадрин,  Владимир  Арьянов,  Николай  Таллаев, Александр Бессонов уонна Василиса Акимова.

— Бэстибээл түһүмэхтэрин хайдах аастыгыт?

— Бэстибээл бастакы түһүмэҕэр – регистрацияҕа сайаапкабытын  кытары  видеобытын  ыыппыппыт. Видеоҕа  туруоруубут  “сиикэй”  соҕус  этэ. Маныаха  көстүүмнэрбит,  реквизиттэрбит ситэ  тигиллэ,  оҥоһулла  иликтэрэ.  Ол  иһин куонкурустан  сыыйыллан  хаалбыппыт.  Онтон олус  хомойбуппут.  Ол  кэнниттэн  толкуйданан, быһаарсан баран, алтынньы 2 күнүгэр Дьокуускай куоракка  киирэн  нүөмэрбитин  көрдөрүөҕүҥ диэн  быһаарыммыппыт.  Онно  сүүмэрдээһини ааспатахпытына  хайыахпытый,  төннөр буоллахпыт   диэн  санаабыппыт.  Ол  эрээри, хамаандам оҕолоро ыспарсымыан буолан, бары тулуйдубут.

Айаннаан  тиийбит күммүтүгэр  нүөмэрбитин көрдөрбүппүт.  Саха  циркэтин дириэктэрэ  Сергей  Расторгуев бөлөхпүтүн  хайҕаабыта  уонна нүөмэргит арыый уһун, кылгатан биэриҥ  диэн  сүбэлээбитэ. Онон  кини   сүбэтин  ылынан, бэлэмнэниигэ  нүөмэрбитин кылгатан  биэрбиппит, муусукабытын,  ырыабытын уларыппыппыт. Ити кэнниттэн киэһэ циркэ  манеһыгар  кыттыбыппыт, олус долгутуулаах этэ.

Икки күннээх куонкуруспут этэҥҥэ түмүктэнэн,  алтынньы  5  күнүгэр наҕараадалааһын  буолбута.  Мин долгуйан,  үөһэ,  ыраах  олорбутум.  Онтон  биһигини ааттаабыттарыгар,  олус  соһуйбуппут,  үөрбүппүт. Бу  биһиэхэ  олус  улахан  ситиһии  буолар. 

Түгэнинэн туһанан, биһигини өйөөбүт Мугудайдааҕы бааһынай хаһаайыстыба салайааччытыгар Илья Дьячковскайга, «Универсам»  маҕаһыын  салайааччытыгар  Айсен Толстоуховка,  Чурапчытааҕы  судаарыстыбаннай физическэй  култуура  уонна  успуорт  үнүстүүтүн кэлэктиибигэр,  улуус  дьаһалтатыгар,  улуустааҕы култуура салалтатыгар, «Айылгы“ норуот айымньытын  дьиэтин  үлэһиттэригэр,  чуолаан  худуоһунньук Иван  Еремеевкэ  уонна  көстүүммүтүн  бэлэмнээбит Лидия Захароваҕа махталбын тиэрдэбин.

— Ханнык жанрынан кытынныгытый?

—  Ыччаты  кытары  араас  тэрээһиннэргэ, кэнсиэрдэргэ үлэлээн, дьон көрүдьүөстээҕи, көр-күлүү жанрын  олус  интэриэһиргииллэрин,  сэҥээрэллэрин билэн,  оҕолору  үөрдэр  клоунадата  (клоуннар кыттыылаах  циркэ  нүөмэрэ)  туруоруохха  диэн  этии киллэрбитим.  Ону  устуудьуйам  ыччата  үөрүүнэн ылыммыттара.  Онон  бэс  ыйын  1  күнүгэр-  Оҕо көмүскэлин  күнүгэр  «КЛОУННАРТАН  ПЭРЭБИЭТ!» диэн бастакы бырайыакпыт олоххо киирбитэ. Манна доҕотторбут  Айсен  Толстоухов  салайааччылаах «Универсам» маҕаһыын кэлэктиибэ өйөөн, оҕолорго, көрөөччүлэргэ  бырааһынньыгынан  босхо  саахар баататын түҥэппиттэрэ. Онтон кынаттанан, клоунада жанрынан  VI-с  норуоттар  икки  ардыларынааҕы циркэ  ускуустубатын  бэстибээлигэр  кыттар  баҕа санааламмыппыт.

—  Саха  сириттэн  ханнык  улуустар  бааллар этэй?

— Саха сирин оройуоннарыттан соҕотох кыттааччы буолан биэрдибит. Арассыыйа араас регионнарыттан уонна  ыраах  тас  дойдулартан  кэлбит  идэтийбит таһымнаах  артыыстары  кытары  биһиги  бөлөхпүт оҕолоро тэҥҥэ, толлубакка, бэйэлэрин чаҕылхайдык көрдөрдүлэр.  Онуоха  циркэ  артыыстарыттан  үгүс элбэх  хайҕабыл  тыллары  иһиттибит.  Ол  эрээри манежка  элбэхтик  дьарыктаммыппыт  буоллар, ситиһиибит  өссө  үрдүк  буолуохтаах  этэ.  Эстрада сцената уонна циркэ манеһа олох ураты буоллахтара.

– Ааҕааччыларга баҕа санааҥ?

—  Улууһум  олохтоохторугар  доруобуйаны,  чөл туруктаах  буолалларыгар  уонна  мэлдьи  үөрэ-көтө сылдьалларыгар баҕарабын!

—  Ярослав,  кэпсээниҥ  иһин  махтал! Ситиһиигитинэн  өссө  төгүл  эҕэрдэлиибин. Инникитин  да  саҥаттан  саҥа  иэйиилэр   киирэн истиннэр, кыайыылар кэлэ турдуннар!

Автор: Марфа ПЕТРОВА.

Источник: http://ulus.media/2019/10/11/churapchy-klounnara-siti-ii-k-t-ll-h-kelliler/