Халлааммыт улам тымныйан Чурапчы улууһугар кыһыҥҥы балыктааһын үгэнэ саҕаланан эрэр. Төлөй Атах сайылыгар ааспыт өрөбүллэргэ нэһилиэк дьонугар-сэргэтигэр анаан улахан муҥха буолан ааста. Барыта 70-тан тахса киһи мустан эбэ соботун тартылар.

Муҥханы Төлөйтөн төрүттээх, билигин улуус киинигэр олорор СӨ доруобуйа харыстабылын туйгуна Егор Дмитриевич Захаров уолаттарынаан, дьиэ кэргэнин, аймах-билэ дьонун кытары көҕүлээн ыыттылар, алгыс сиэрин-туомун тэрийдилэр. “Бу маннык муҥханы быйыл нэһилиэккэ “Сомоҕолоһуу” сылынан нэһилиэк түмсүүлээх буоллун диэн уонна аймахтар эмиэ түмсүүлээх буолуоҕуҥ диэн өйдөбүлүнэн дьоммутугар муҥха бырааһынньыгын бэлэхтээтибит,” – диэн Егор Дмитриевич кэпсиир.

Үлэһит үтүө дьон чардаат алларан бастаа-утаа муҥха бэчимэтин баайан ууга угааттарын кытары муҥха саҕаланна. Үтүмэх мас анньыллан ойбон аллардылар, нырыыһыттан субуруһан туран эрэ балыгы үүрэр тыастара иһилиннэ. Ол түмүгэр көмүс хатырыктаах муҥха ийэтин муҥунан кэллэ.

Эбиэт бириэмэтигэр Захаровтар дьиэ кэргэн аҕалара Дмитрий Николаевич Захаров I 100 сылын туолуутугар анаан таһааттарбыт “Аҕабыт туһунан иһирэх тылынан” (кинигэ ааптара Евдокия Соловьева) кинигэни аймах-билэ дьонугар, үөлээннээхтэригэр, доҕотторугар бэлэх ууннулар.

Былыргы сиэринэн муҥха оонньуулаах-көрдөөх буолар. Ыччакка анаан нырыыны ыраах быраҕыыга, мууһунан ким уһуннук халтарыйарыгар уонна үөһэ ыйанан турар мас собону үрдүккэ тэбиигэ күрэхтэһии ыытылынна. Кыайыылаахтар дьоһуннаах бириистэринэн наҕараадаланнылар.

Мустубут дьон эбэ эмис соботугар тииһинэн, Атах сайылык сибиэһэй, ыраас салгынан толору тыынан, бэйэ-бэйэлэрин көрсөн улаханнык үөрэн-көтөн, түмсүүлээх буоларга бэлэмнээх тарҕастылар.

Ааптар: Семен Жендринскэй.

Источник: http://ulus.media/2019/10/28/ajmah-t-holobura-t-l-j-donun-somo-olooto/