Бүгүн, сэтинньи ый 1 күнүгэр, Чурапчы нэһилиэгин Александр Федотов аатынан элбэх өҥөнү оҥорор ыспартыыбынай саалаҕа, билиҥҥи кэмҥэ бэйэтин суолтатын биллэ көрдөрбүт ППМИ, быһааран эттэххэ олохтоох көҕүлээһини өйүүр бырагыраама чэрчитинэн нэһилиэнньэ улахан түмсүүтэ тэрилиннэ. Чурапчы сайдыытыгар улахан хардыылары оҥорор бырагыраама олоххо киириэхтээх сүрүн боппуруостарын таарыйар мунньахха улуус баһылыгын эбээһинэһин толорооччуну социальнай боппуруостарга солбуйааччы Николай Аммосов, тутуу уонна архитектура боппуруостарыгар солбуйааччы Руслан Васильев, Чурапчы нэһилиэгин баһылыга Владимир Сивцев, нэһилиэк баһылыгын солбуйааччы Алексей Бурцев кыттыыны ыллылар.

Олохтоох көҕүлээһини өйүүр бырагыраамаҕа Чурапчы нэһилиэгин олохтоохторун көмөлөрүнэн “Айыллаан” киинэ тыйаатырын өрөмүөнэ, “Молодежнай” түөлбэҕэ сайыҥҥы уу турбатын ситимэ, П.Е.Барахсанов аатынан сынньалаҥ пааркатын сөргүтүү, “Мурун Тыымпыйа”, “Куоҕалы”, “Спортивнай”, “Маарыкчаан” түөлбэлэргэ уулуссаны уотунан сырдатыы күүстээх үлэлэрэ олоххо киирбиттэрэ. Эһиилги 2020 сылга олоххо киириэн сөптөөх биэс улахан боппуруос көтөҕүллүбүтүн олохтоох нэһилиэнньэ алтынньы ый 21 күнүттэн сэтинньи 1 күнүгэр диэри интэриниэт ситимин нөҥүө маҥнай куоластаан көрдөрдө, ол ону бигэргэтэн бүгүҥҥү улахан мунньахха 3000 кэриҥэ киһи кыттыыны ылла.

Аһаҕас микрофоҥҥа бэйэлэрин санааларын, сүбэлэрин нэһилиэк убаастанар, үлэҕэ-хамнаска инники кэккэҕэ сылдьар дьоно Иван Бушков, Варвара Пудова, Сахаайа Лаврова, Константин Лыткин, Александр Дьяконов о.д.а. тиэртилэр.

Куоластааһын баһыйар үгүс өттүн ылан 2020 сылга маҥнайгынан “Айылгы” сынньалаҥ киинин өрөмүөнэ, иккиһинэн уулуссалары сырдатыы, үсүһүнэн дьон сатыы сылдьар сирдэрин уонна төрдүһүнэн нэһилиэк киин баанньыгын өрөмүөнүн үлэлэрэ ыытыллар буоллулар, ыйыллыбыт этиилэр боротокуолга киирдилэр.

Онон Чурапчы нэһилиэгин олохтоохторо биир санаанан сомоҕо буолан түмсэн, сайдыы оҥкулун бигэтик туруорсан, үүнүү-сайдыы суолугар үктэнэр кыахтаннылар.

Ааптар: Семен Жендринскэй.

Источник: Ulus media