Дойду үрдүнэн ис дьыала уорганнарын үлэһиттэрин күнүн көрсө бүгүн, сэтинньи ый 8 күнүгэр, Чурапчытааҕы полиция отделыгар улууска дьон-сэргэ куттала суох буолуутун хааччыйар биир тутаах уорган сайдан кэлбит устуоруйатын, туохтан хаһан саҕаламмытын көрдөрөр-сырдатар мусуой үөрүүлээх арыллыыта буолла.

Үөрүүлээх чааска Чурапчытааҕы ис дьыала отделын начаалынньыга, полиция подполковнига Иннокентий Свинобоев: “Бу үлэбит-хамнаспыт сыл саҕаланыытыгар бүтүн кэлэктиибинэн туруорунан үлэлэһэр үс бырайыакпытыттан биирдэстэрэ буолар. Ол курдук бу сайын отделбыт иннигэр Николай Кривошапкин-Уот Субуруускайга анаммыт бюст туруорбуппут, бүгүн мусуой хоһун арыйдыбыт уонна оттон табылыннаҕына отдел устуоруйатын кэрэһэлиир кинигэни бэчээттэтэн таһаарар былааннаахпыт. Өрүү буоларыныы бу маннык саҕалааһыннарга күүс-көмө, сүбэ-ама буолар дьонноохпут, түгэнинэн туһанан отделбыт бэтэрээн үлэһиттэригэр, улууспут, нэһилиэктэрбит баһылыктарыгар, бэйэм отделым үлэһиттэригэр дириҥ махталбын тиэрдэбин”, — инньэ диэн туран мусуой арыллыытын туоһулуур күлүүһү отставкаҕа олорор ис сулууспа майоругар, бэтэрээннэр Сэбиэттэрин бэрэссэдээтэлигэр Дмитрий Евграфовка туттарда.

Аалай кыһыл лиэнтэни улуус баһылыгын социальнай боппуруостарга солбуйааччы Николай Аммосов, Чурапчы нэһилиэгин Аҕа баһылыга Владимир Сивцев быһыстылар.

Маны таһынан Иннокентий Дмитриевич буолаары турар ис дьыала уорганнарын үлэһиттэринэн күнүнэн итиитик-истиҥник эҕэрдэлээтэ, туһааннаах отдел үлэһиттэригэр үбүлүөйүнэй мэтээллэри, өрүү сүбэ-ама буолар, көрдөрө-иһитиннэрэр хампаанньа суруналыыстарыгар махтал суруктары туттарда.

Урукку үлэлээн ааспыт отдел сотрудниктарын үлэлэрин-хамнастарын көрдөрөр, итиэннэ араас элбэх интэриэһинэй экспонаттардаах мусуой хос улуус олохтоохторун, үөрэнээччилэрин сэҥээрдиэ диэн эрэнэбит.

Ааптар: Семен Жендринскэй

Источник: UlusMedia