Сэтинньи 20 күнүгэр Болтоҥоҕо Виктор Саввин аатынан норуот айымньытын  дьиэтигэр нэһилиэк тыатын хаһаайыстыбатын үлэһиттэригэр анаммыт бырааһынньыктааҕы дьаһал буолла. Бу күн эдэр фермер Алексей Иванов саҥа типовой хотоно үлэҕэ киирдэ.

Бу күн Болтоҥоҕо саҥа типовой хотон үлэҕэ киллэриллиитин сиэрэ-туома ыытылынна, ас-үөл дьаарбаҥката тэрилиннэ, тыа хаһаайыстыбатын производствотын бастыҥнарын сырдатар истиэндэлэр туруорулуннулар.

Нэһилиэккэ 2019 сыл 10 ыйыгар тыа хаһаайыстыбатын үлэлэрин туругун, инники соруктар тустарын дакылааты баһылык Варвара Макарова оҥордо. Итиннэ этиллэринэн бу хайысхаҕа сүрүн көрдөрүүгэ—үүтү соҕотуопкалааһыҥҥа кэлиҥҥи сылларга былаан туолбатаҕа, ол эрээри сүөһү ахсаана былырыыҥҥыттан 57 төбөнөн эбиллибитэ, 7 хаһаайыстыба саҥа хотону тутан киллэрбитэ, былырыыҥҥыга тэҥнээтэххэ, быйыл 13 туоннанан элбэх үүт ыаммыта бэлиэтэннэ.  Сылгы ахсаана 161-нэн эбиллибит.  Оттооһуҥҥа былаан 108,2 бырыһыан толоруллубут. Үүтү, эти дэлэтиигэ бары усулуобуйалар баалларынан таһаарыылаахтык  үлэлииргэ ыҥырда.

Үрүҥ илгэни үрүлүтээччилэри, эмис эти дэлэтээччилэри улуустааҕы тыа хаһаайыстыбатын управлениетын начаалынньыга Анна Захарова бырааһынньыгынан эҕэрдэлээн туран, улуус тыатын хаһаайыстыба салаатыгар үлэтин билиһиннэрдэ. Быйылгы сыл уратытынан сиргэ үлэҕэ үрдүк көрдөрүү ситиһиллибитин бэлиэтээтэ. Бу салааҕа нэһилиэк ылсан, күүскэ үлэлииригэр сорук туруорда.

Бастыҥ үлэһиттэргэ улуус дьаһалтатын, тыа хаһаайыстыбатын управлениетын, нэһилиэк дьаһалтатын, Ил Түмэн тыа хаһаайыстыбатын салаатыгар бастайааннай кэмитиэтин наҕараадалара туттарылыннылар. Бааһынай  хаһаайыстыбаларга, чааһынайдарга анал номинациялары шефтээх тэрилтэлэр, колхуос, сопхуос бастыҥ үлэһиттэрин оҕолоро олохтообуттара туттарылынна. Кыайыы 75 сылын көрсө ыытыллыбыт түөлбэлэринэн фестиваль кыайыылаахтарын кэнсиэрэ буолла.

Сүүйүүлээх оонньуу оонньонон, дьоллоох билиэттээхтэр өттүк-харалаах, илии тутуурдаах дьиэлээтилэр.

Ааптар: Алексей  СЛЕПЦОВ.

Источник: UlusMedia